Комуналниот отпад од Виница, Чешиново-Облешево и Зрновци, повторно ќе се депонира на градската депонија во Кочани. Дополнително Владата, финансиски ќе помага за нејзиното одржување, дециден е министерот за животна средина Изет Меџити. Според него ова е единствено решение на проблемот кој се провлекува повеќе од еден месец.
„Финансиски обврските ќе ги преземе владата, а тие пак ќе се вратат на депонијата….Проблемот беше финансиски бидејќи Општина Кочани не можеше да се носи со тоа и ние одлучивме да им излеземе во пресрет и да се реши овој проблем„ изјави министерот за животна средина Изет Меџити.
Но, за еко активистите од Кочани, ваквото решение може повторно да ги реактивира протестите. Категотирични се дека комуналните возила со отпад на соседните општини ќе ги пуштаат , но откако ќе се започне со градба на регионалната депонија во светиниколско Мечкуевци, а дотогаш порачаа, отпадот секој да си го третира во својот „двор„.
На 18 октомври беше распишан тендерот за изградба на регионалната депонија кај светиниколско Мечкуевци, која треба да биде готова за две и пол години.
„Веќе работиме интензивно со проектот на Европската банка за развој. Кредитот е преземен од Министерството за животна средина, кој е во вредост од 5 5милиони евра за регионалните депонии„ изјави Изет Меџити.
Со пари од Европската банка за обнова и развој е предвидено во држвата да се изградат четири регионални депонии, а во депонија кај светиниколско Мечкуевци, ќе се преработува отпадот од 18 општини од источниот и североисточниот регион.
Александра Ристевска
