За 4 месеци сработено повеќе отколку за две години. По подолг застој, забрзано се врши експропријација на имотите долж патиштата, па поради тоа и градењето се одвива со побрзо темпо. Од сите проблеми со кои надлежните се соочија при изведбата на автопатот Кичево – Охрид, експропријацијата беше еден од најтешките и најбавните. Дополнително, надлежните велат дека ниту еден предмет за експропријација не бил комплетиран на стартот на летово за делниците што ги гради „Бехтел и Енка“. Најавија дека 2.400 предмети за експропријација не се завршени, но дека прават напори се да биде готово до Нова Година. Од градежната компанија Гранит велат дека бирократијата, но и неразрешените имотно-правни односи значително ги кочеле процесите. Значителен напредок имало во последниве неколку месеци, но Здружението за градежништво побарало законски измени за експропријацијата да се одвива побрзо и компаниите да избегнат да плаќаат пенали поради доцнење.
„Воспоставување на еден таков систем интегриран помеѓу сите тие институции и утврдување на тие рокови и мала измена на самата постапка ќе даде една можност за капиталните проекти да можат да ги остварат своите целосни капацитети. Верувајте и инвеститорот и изведувачот се во многу незавидна положба во тие постапки. Од една страна, нас не газат роковите и притисокот ние проектот да го изведеме најефикасно и да не потрошиме многу пари, а од друга страна имате ограни кои треба да ја завршат својата работа, да донесат определено решение за да можете вие тоа да го спроведете“ – вели Марија Шеќероска – раководител на Служба за правни работи во Гранит.
По најавите за рекордно ниво на инвестиции од над 800 милиони евра за изградба на патишта, пруги, училишта, градинки и други инфраструктурни проекти, градежните компании тријат раце. По долгогодишна замреност, се надеваат дека и тие ќе излезат од криза, но и граѓаните и фирмите ќе добијат побрз превоз и транспорт на стоки.
Градежниците особено се надеваат дека работите ќе тргнат на подобро со изградбата на четирите делници кои ги гради Бехтел и Енка. По откочувањето на процесите, веќе се видливи резултатите на терен. Владини претставници веќе извршија увид во патните правци Прилеп – Битола и Гостивар – Букојчани кадешто забрзано се гради. Проектот треба да биде готов за повеќе од 4 и пол години.
