Екстремисти биле Македонската православна црква и свештениците од Свети Наум Охридски на Попова Шапка, вели човекот кој не претендира и не дематира дека сака да води Македонија од позицијата претседател. За Оливер Спасовски екстремизам, со цел подгревање на меѓутеничките тензии бил крстот на црковен имот. Спасовски ова реши да го изговори на традиционалниот новогодишен брифинг со медиумите, во делот каде што нема камери и не е дозволено да се снима. Запрашан за став околу последните случувања и одлуката за рушење на крстот, Спасовски кој важи за главен фаворит за претседателски кандидат на СДСМ, одговори дека било дел од политички фолклор.
-Кога зборувам за екстремистички групи, и тоа се екстремисти кои што сакаат на еден или на друг начин да предизвикуваат меѓуетнички конфликти и тензии. Тој политички фолклор ќе се засилува сега како ќе наближуваат изборите, ќе се засилува и ќе играат на карта на национализам, на рушење на вредности, изјави Спасовски.
Слично искуство имал и претходно. За Спасовски проблематичен е и крстот кој бил поставен во Бутел во 2015-та и тој бил со цел да му се наштетело, во моментите додека беше технички министер.
-Тоа е фолклор кој што не враќа во 2015-та година, кога јас станав министер. Немајќи што да прават во тој момент, ќе прават крст во Бутел. Зошто? За да ти кажат, ај да те видиме сега како ќе се справиш и што ќе правиме со крстот. Е ова е истата ситуација, изјави Спасовски.
Одредени медиуми го обвинија секретарот на Општина Тетово, Дарко Коцевски дека ја потпишал одлуката за уривање на крстот. Тој демантира, вели не потпишал никаква одлука, ниту пак имал ингеренција за тоа, ниту тој, ниту градоначалникот Билал Касами.
-Прво се носи опомена за уривање за да се исправат неправилностите констатирани на терен. Одлуката за рушење ја донел градежен инспектор на општина Тетово. Но, вакви градби за рушење има околу 5000, којзнае кога ќе му дојде редот, изјави Коцевски.
Коцевски и смирува дека сега сигурно нема да има рушење на крстот, бидејќи тетовско- гостиварската епархија поднела жалба до второстепениот орган.
Матеја Петровски
