Енергетската безбедност, транзицијата кон обновливи извори на енергија, зеленото финансирање и регионалната соработка ќе бидат во фокусот на Првиот форум за енергетска дипломатија „Обновливи извори и жените во енергетиката“, што ќе се одржи на 25 ноември во Скопје.
Министерството за енергетика, рударство и минерални суровини најавува учество на домашни и меѓународни експерти, претставници на институции, дипломатскиот кор, меѓународни организации и бизнис-заедницата, со цел поттикнување стратешки дијалог, размена на искуства и воспоставување нови партнерства во енергетскиот сектор.
Посебен акцент на форумот ќе биде ставен на улогата на жените во енергетиката, нивното лидерство и придонесот во креирањето енергетски политики и развојот на енергетската дипломатија.
Форумот го организира Министерството за енергетика, рударство и минерални суровини во партнерство со Канцеларијата на Обединетите нации во Северна Македонија, Програмата за развој на Обединетите нации (УНДП) и Економската комисија на Обединетите нации за Европа (УНЕЦЕ).
Според организаторите, целта е да се отворат нови можности за регионална соработка, инвестиции и заеднички иницијативи насочени кон создавање одржлив, сигурен и поотпорен енергетски систем во регионот.
