Екипите на ЈП „Комунална хигиена“- Скопје извршиле целосно расчистување и рачно миење на целокупниот простор под Камениот мост во Скопје.
Во рамки на редовните активности биле отстранети и вкупно 905 кубни метри мешан комунален, кабаст и градежен отпад од диви депонии лоцирани во сите скопски општини. Најголемо количество непрописно одложен отпад – вкупно 190 кубни метри, е расчистено во општината Ѓорче Петров.
-Претпријатието подигна и транспортира приближно 3 000 тони мешан комунален отпад од домаќинствата и правните субјекти на територијата на градот Скопје. Воедно продолжи и замената на старите и дотраени контејнери со новите садови наменети за одлагање на комуналниот отпад, при што во моментов се заменети вкупно 700 контејнери – информираат од ЈП „Комунална хигиена“ Скопје.
Еко-патролата на ЈП „Комунална хигиена“ – Скопје минатата недела изготвила 25 записници за лица и правни субјекти затекнати при кршење на Законот за јавна чистота. Најголем број на записници, вкупно десет, биле врачени на територијата на Чаир.
Со еко-работилници во градинката „Снежана“ лоцирана во општината Чаир, ЈП „Комунална хигиена“ – Скопје ги започна едукативните активности за правилно постапување со отпадот за учебната 2026/2027 година. Во работилниците, како што информираат, учествувале вкупно 150 дечиња од двата објекта на градинката, коишто се запознале како правилно да го одлагаат отпадот и да ја вршат неговата примарна селекција и како се одвива процесот на рециклирање и реупотреба на комуналниот отпад.
