Зелената транзиција претставува развојна можност за привлекување нови инвестиции, зголемување на конкурентноста на компаниите и отворање одржливи работни места, беше истакнато на денешната средба меѓу министерот за животна средина и просторно планирање, Муамет Хоџа, и претставници на Стопанската комора на Македонија – Турција (МАТТО).
Како што соопшти Министерството за животна средина и просторно планирање, на средбата се разговарало за можностите за соработка во процесот на зелена транзиција, поттикнувањето инвестиции во зелени технологии и подобрувањето на деловното окружување.
Хоџа истакнал дека турските компании и стопанственици претставуваат значаен дел од деловната заедница и оти нивното знаење, искуство и капитал можат да придонесат во процесите на модернизација и зелена трансформација на македонската економија.
– Сакаме нивното знаење, искуство и капитал да бидат дел од процесите на модернизација и зелена трансформација на нашата економија. За тоа ни се потребни отворен дијалог, партнерство и предвидливи услови за инвестирање – истакна Хоџа.
Според министерот, целта е да се изгради систем во кој заштитата на животната средина и економскиот развој се надополнуваат и во таа насока изрази подготвеност за разговор за конкретни инвестициски иницијативи.
Во фокусот на разговорите биле инвестициите во обновливи извори на енергија, енергетската ефикасност, управувањето со отпадот, рециклирањето, циркуларната економија и развојот на зелени технологии. Притоа, било нагласено значењето на вклучувањето на приватниот сектор во спроведувањето на националните и европските цели за климатска акција и заштита на животната средина.
Соговорниците ја истакнале и важноста од продолжување на дијалогот меѓу институциите и бизнис-заедницата, како и од организирање заеднички активности и деловни форуми посветени на развојот на зелената економија.
