Сушата е причина за доцнење на есенската сеидба на житните култури во Штипскиот Регион. Потпретседателот на Асоцијација на земјоделци, Гоце Серафимовски вели дека на земјоделците климатските промени им прават големи проблеми пред стартот на сеидбата на јачменот и пченица и поради недостаток на дожд со земјоделската механизација не можат да влезат во нивите, за да ги изораат.
– Ваква година не се памети. Нема дождови и речиси 80 до 90% од површините не се изорани. По жетвата и летото беше сушно, не можевме да ги изораме. Ако заврне за викендов некој дожд земјоделците ќе можат да влезат во површините и да ги спремат- рече Серафимовски.
Зголемените трошоци за сеидба, како што се нафтата и вештачките ѓубрива ги зголемија и производствените трошоци. Според пресметките на Серафимовски, колу 1500 денари за декар чинат подготовките за сеидба, што за земјоделците не е исплатливо. Серафимовски вели дека постојано се во контакт со ресорното министерство и ќе бараат помош преку интервентниот фонд. Инаку македонските земјоделци 85% од површините ги сеат со житни култури во текот на есента, за да имаат поголеми приноси.
-Нафтата е покачена околу 20%. Ѓубривата исто така се покачени. Ние сме во контакт со министерството, ќе бараме да се вклучи некој интервентен фонд- рече Серафимовски.
Во Штипскиот Регион житните култури, односно јачменот и пченицата се сеат наесен, бидејќи се добиваат повисоки приноси.
