Пред ученици и наставници од општинското основно училиште “Владо Кантарџиев” во Гевгелија попладнево се промовираа детските сликовници „Кошница со калинки“ и „Штркот Гвин“ од македонската поетеса, есеистка и книжевен критичар д-р Марина Мијаковска.
Во малата сала на Народниот театар во Гевгелија авторката ја одржа промоцијата со интерпретација на приказните од сликовниците, а во промоцијата учествуваа и дел од учениците. Организатор на настанот кој се одржа во рамки на одбележувањето на детската недела е Градската библиотека „Гоце Делчев“ од Гевгелија.
Во белешката за „Кошница со калинки“ стои дека сликовницата е инвентивна и едукативна, наменета за децата од предучилишна и од рана училишна возраст. Со помош на приказната децата се едуцираат на сликовит начин да дознаат каде, кога и како расте, цути и созрева калинката, каква боја има цутот, а каква плодот, што содржи и зошто е здраво да се јадат калинки.
Книгата ја развива љубопитноста кај децата и говорните вештини преку ликот на девојчето со име Калина која набљудувајќи го дрвото со калинки во бабината градина, учи за нив и го пренесува знаењето на својата другарка Лина. „Штркот Гвин“ е нова книга за деца што низ авантурите на истоимениот протагонист носи приказна инспирирана од Скопје, неговото културно наследство и чувството на припадност. Сликовницата е наменета за деца од училишна возраст, но е замислена и како четиво што може да го привлече вниманието и на повозрасната публика.
