Министерот за здравство Сашо Клековски денеска изјави дека ја потпишал согласноста за измените и дополнувањата на правилникот за боледувањата и дека тие набргу ќе бидат објавени во „Службен весник“ и со тоа ќе стапат во сила.
– За подобрувањата за разни групи на пациенти нема да говорам, мислам дека Фондот за здравствено осигурување (ФЗО) имаше соопштение вчера за тоа кои ќе бидат олеснувањата за да не се стекне впечаток дека само се зголемуваат контролите – додаде Клековски.
Тој неодамна рече дека сите измени на правилникот за боледувањата, кои се планирани, се правени врз основа на компаративни анализи, има многубројни злоупотреби на боледувањата и целта е тие да се спречат. Истакна дека не смета оти намалувањето на периодот за кој матичен лекар може да отвори боледување од седум на пет дена е казна за граѓаните оти, вели, има инфлација на боледувања, на такви што се издаваат на телефон. Според него, пет дена за такво боледување е сосема доволно.
Директорот на Фондот за здравствено осигурување (ФЗО), Златко Перински, пак, истакнува дека предложените измени на правилата за боледување не го скратуваат правото на боледување, туку предвидуваат медицинските критериуми за продолжување да почнат да се применуваат по петтиот наместо по седмиот ден.
Во правилникот за боледувањата на ФЗО се наведува дека матичниот лекар и натаму останува надлежен да ја утврдува привремената спреченост за работа до 15 дена, а за период подолг од 15 дена одлучува лекарската комисија на Фондот.
Промената од седум на пет дена не значи дека боледувањето завршува на петтиот ден. Станува збор за период по кој, доколку здравствената состојба бара продолжување на боледувањето, се применуваат медицинските критериуми предвидени за конкретната дијагноза. Клучната граница од 15 дена во надлежност на матичниот лекар останува непроменета. Истовремено, со измените се воведуваат повеќе конкретни олеснувања за осигурениците и матичните лекари, со цел да се намалат непотребните административни постапки и движењето на пациентите низ здравствениот систем – информираат од ФЗО.
Од таму велат дека меѓу поважните олеснувања се: за некои од дијагнозите нема да биде потребно пациентот да се упатува на лабораториски испитувања, туку процената ќе може да ја направи матичниот лекар; за некои од дијагнозите се проширува временската рамка предвидена со критериумите; по 15-тиот ден, предлогот за привремена спреченост за работа – ПСР матичниот лекар ќе го доставува електронски наместо преку досегашната рачна постапка; се прошируваат случаите во кои боледувањето ќе може да се утврди без физичко присуство на осигуреникот, особено кај тешко болни, неподвижни и тешко подвижни лица, лица на болничко лекување, како и во други оправдани случаи; кај хроничните заболувања ќе може да се користат постојните дијагностички наоди доколку се во предвидениот период на важност, без непотребно повторување на истите испитувања; се прецизираат условите за ретроактивно утврдување на боледувањето во оправдани случаи, меѓу кои по завршено болничко лекување; за бремени жени и доилки се предвидува олеснување во однос на радиодијагностичките испитувања со јонизирачко зрачење кога здравствената состојба е соодветно потврдена со специјалистички извештај; кај определени тешки заболувања се предвидуваат исклучоци од обврската за конзилијарно мислење кај боледувањата подолги од 60 дена.
