Мрежата за заштита од дискриминација е против предлогот на Стопанската комора за неработните денови и за нивно индивидуално договарање меѓу работниците и работодавачите, оценувајќи дека работничките права мора да останат законски гарантирани и да не зависат од поединечни договори.
Во реакцијата, Мрежата наведува дека користењето на работничките права не смее да зависи од волјата на работодавачот или од преговарачката позиција на работникот, особено имајќи предвид дека работниците со пониски примања и несигурни форми на вработување се најизложени на притисоци.
– Работничките права мора да бидат заштитени со закон и колективни договори. Нивното користење не смее да зависи од волјата на работодавачот или од преговарачката моќ на работникот – се наведува во реакцијата.
Од Мрежата сметаат дека индивидуалното договарање за користење на неработните денови може да доведе до ситуации во кои работниците, стравувајќи за своето работно место, ќе се откажуваат од правата што им следуваат.
Во реакцијата се посочува и дека ниту работодавачите ниту Стопанската комора не треба да одлучуваат кој и под какви услови може да користи празник како неработен ден.
Мрежата за заштита од дискриминација бара сите евентуални измени што ги засегаат работничките права да бидат предмет на социјален дијалог меѓу Владата, синдикатите и работодавачите.
Оттаму апелираат до Владата да не прифаќа префрлање на постојните права од законска гаранција во сферата на индивидуалното договарање, како и да се задржи постојната заштита која предвидува дополнителен неработен ден кога празник паѓа во недела.
Според Мрежата, подобрата продуктивност не се постигнува со намалување на правата на работниците, туку преку инвестиции, подобра организација на работата, безбедни услови за работа и достоинствени плати.
– Ни требаат подобри услови за работа, силни колективни договори и вистински социјален дијалог. Работничките права не се предмет на пазарење – порачуваат од Мрежата за заштита од дискриминација.
