Артан Груби наредната недела излегува на слобода, но тоа, се чини дека не му е доволно. Освен што ќе може да излегува од дома, веројатно сака и да ги има придобивките на секој слободен граѓанин, иако против него се води судски процес за проневера на речиси 10 милиони евра во Државната лотарија. Сега решил да си го врати пасошот за што нуди и парична гаранција. Неговите бранители излегоа со предлог за гаранција во имот во вредност од 335000 евра, што, според нив, би требало да биде доволно да се убеди судот дека Груби нема да избега од државата за време на судењето. Во моментов, покрај мерката куќен притвор која истекува за точно една недела, за Груби важи и мерка за претпазливост, односно одземање на патната исправа и забрана за издавање на друга.
„Во однос на оваа мерка на претпазиливост, одбраната до Судот достави предлог, со кој, согласно член 150 од Законот за кривичната постапка, предлага нејзино укинување со определување гаранција. Имено, одбраната понуди недвижен имот во вредност од 335707 евра како гаранција дека обвинетиот ќе биде достапен на органите на прогонот во текот на кривичната постапка“, соопштија од Основен кривичен суд Скопје
Според законот, мерката куќен притвор може да трае најмногу 60 дена од денот на поднесувањето на обвинителниот предлог, во овој случај тој беше поднесен на 13 август. Но ова не важи и за мерката претпазливост на чие симнување работи одбраната на Груби. Таа мерка законски ќе продолжи да важи и по истекувањето на двата месеца.
Конечниот збор ќе го има судот, земајќи ги предвид сите факти. Артан Груби беше во бегство надвор од државата. Тогаш кажа дека не бега од правдата туку отишол да заврши некоја работа по што веднаш ќе се врател во Македонија. И се врати, но 14 месеци подоцна, кога доброволно се предаде на полициските злужбеници на граничниот премин Блаце. На првото рочиште за случајот Државна лотарија се изјасни за невин.
