Денеска, во Собранието, беше презентиран Извештајот на Светска банка „Македонија: Излез од стапицата на среден доход“, кој се однесува на економските предизвици и можностите за забрзување на економскиот раст и надминување на т.н. стапица на среден доход, се наведува во соопштението од собраниската прес-служба.
На презентацијата присуствуваше претседателот на Собранието, Африм Гаши, како и пратеници, кои имаа можност да се запознаат со клучните согледувања содржани во Извештајот.
Извештајот го презентираа Сања Маџаревиќ-Шујстер и Карол Межеванд од Светска банка, кои ги претставија неговите главни наоди, анализи и препораки за понатамошниот економски развој на земјава.
Посочени беа клучните предизвици за натамошниот економски развој на земјата, меѓу кои ниската продуктивност и инвестиции, слабата конкуренција и владеењето на правото, како и недоволно искористениот и сè помал човечки капитал.
Претставниците на Светска банка истакнаа дека забрзувањето на економскиот раст бара спроведување реформи во повеќе области, со посебен акцент на подобрување на управувањето и конкурентноста, поттикнување на инвестициите, технологијата и иновациите, како и развој на вештините и подобро искористување на работната сила.
Според презентираните процени, целосното спроведување на реформската агенда може да придонесе за повисок економски раст, создавање нови и подобро платени работни места и побрзо приближување на државата кон нивото на доход во Европската Унија.
Како клучен предуслов за остварување на овие цели беше нагласена потребата од континуирана политичка посветеност, институционален капацитет и доследно спроведување на реформите.
