Саем на домашни производи се реализира денеска во центарот на Кавадарци. Настанот „Тиквешија плодна лоза благородна“ е во организација на здружението „Винотек“, со поддршка на Министерството за земјоделство, шумарство и водостопанство.
Присутните имаат можност да дегустираат и да купат домашни производи од земјоделско производство од поднебјето на Тиквешкиот регион.
Претседателот на „Винотек“, здружение што се занимава со промоција на домашни производи и развој на туризам, Јован Еленов изјави дека целта е да се промовираат домашните производи.
– За првпат организираме ваков настан во нашиот град и досега посетителите велат дека е потребно почесто да се случува ова. Нудиме висококвалитетни производи. Мислам дека тоа ќе влезе во традиција на градот и дека ќе привлече луѓе од самиот град, но и посетители од страна – рече Еленов во изјава за МИА.
Тој додаде дека овој период раздвиженоста во градот е голема, во недела луѓето се слободни, па имаат можност и да дојдат, да видат и да купат домашни производи.
