Општина Кисела Вода и Јавното претпријатие за благосостојба на животни скитници „Лајка“ – Скопје утре во паркот „Македонија“ пред Домот на култура „Билјана Беличанец“ организираат настан посветен на миленичињата и бездомните животни.
Под мотото „Не можат да зборуваат, но можат да сакаат“, настанот се организира во пресрет на Светскиот ден на животните.
Дневната програма почнува во 11 часот, а просторот во паркот ќе претставува интерактивна зона за посетителите и милениците. Присутните ќе можат да добијат стручни совети од ветеринарен лекар за здравствената грижа и исхраната, додека професионални грумери ќе одржат практични демонстрации, консултации и шишање на кучиња. Во рамките на настанот предвидени се и содржини од пет-шопови, презентации на храна и реквизити. Исто така, сите заинтересирани граѓани ќе имаат можност на лице место да вдомат бездомни кучиња од стационарот на „Лајка“.
Во рамки на програмата во 19 часот на истата локација пред киното „Киноверзум“ ќе се одржи кино проекција на отворено на филмот „Приказната за Силјан“. Граѓаните се поканети на проекцијата да присуствуваат во друштво на своите миленичиња, информираат од општината.
