– Во Куманово започнаа деветтото издание на меѓународниот саем на органски и традиционални производи „Органска трпеза 2026“ и петтото издание на саемот за земјоделство, технологии, храна и преработки „Агромак 2026“.
На просторот пред спортскиот комплекс „Базени“, бројни излагачи од Македонија и земјите од регионот ги претставија своите производи, технологии и услуги. Организатори на саемите се Здружението „ЖИВОТ“ од Куманово и Комората на органски производители на Македонија – КОП.
Министерот за земјоделство, шумарство и водостопанство, Борче Серафимовски, го отвори саемот и кажа дека органското земјоделство е современ, прецизен и контролиран начин на производство што бара знаење, следливост и одговорност кон животната средина и здравјето на луѓето.
-Органскиот производител заслужува систем што ќе го препознае неговиот дополнителен труд и ќе го заштити од погрешно декларирани производи и нелојална конкуренција-истакна министерот Серафимовски.
Тој нагласи дека политиките на Министерството за земјоделство, шумарство и водостопанство се насочуваат кон засилена контрола, сигурна сертификација, потврден квалитет и поголема видливост на домашните органски производи.
-Добриот производ се создава на нива или на фарма, но неговата вредност се потврдува на пазарот. Новата механизација, дигиталните решенија, прецизното наводнување и современата опрема за преработка им овозможуваат на производителите порационално да ги користат ресурсите, да ги намалат загубите и да создаваат повисок квалитет-порача министерот Серафимовски.
Директорот на Царинската управа, Бобан Николовски оцени дека „Органска трпеза“ од година во година прераснува во значајна платформа за промоција на домашното производство, земјоделството и прехранбената индустрија, како и за нивно поврзување со регионалните и европските пазари. Тој посочи дека Царината работи на создавање подобри услови за производителите и компаниите, со фокус на побрзи, поедноставни и попредвидливи царински постапки, усогласени со европските стандарди.
– Во изминатите две години сериозно го модернизираме царинското работење, воведуваме современи европски системи и ги модернизираме граничните премини. Оваа година продолжуваме и со проект за целосна автоматизација на граничните царински терминали и воведување паметни граници. Модернизацијата на царинските процедури има вистинска вредност доколку производителите и трговците ги почувствуваат директните придобивки преку побрзо и посигурно пласирање на производите на домашниот и меѓународниот пазар-рече Николовски.
Според него поддршката на легалната трговија е еден од приоритетите на Царинската управа, при што спречувањето на нелегалната трговија е важно и за заштита на конкурентноста на домашните производители, посочувајќи дека скратените административни процедури за малите производители оставаат простор за реализација на нивната суштинска дејност производството, развојот и освојувањето нови пазари.
Тој додаде дека олеснувањето на легалната трговија мора да оди заедно со заштитата на безбедноста и доследното спроведување на законите.
– Борбата против нелегалната трговија е и борба за оние кои работат чесно, произведуваат квалитетно и ги почитуваат правилата. Нашата цел е јасна, да создадеме средина во која легалниот бизнис има услови да расте, а правилата важат еднакво за сите-нагласи Николовски.
Претседателката на Советот на општина Куманово, Ивана Ѓорѓиевска кажа дека е задоволство што саемот во Куманово привлекува излагачи од земјите од регионот.
Претседателот на Комората на органски производители, Драган Цветковиќ смета дека суштината на саемот е поврзувањето на производителите од различните земји.
– Целта на саемските манифестации е промоција на производи и услуги, воспоставување деловни контакти, размена на искуства и знаења и отворање можности за нови партнерства и соработка во земјоделството, производството на храна, преработувачката индустрија и сродните области-изјави Цветковиќ.
Двата саема ќе траат три дена и годинава се поставени како регионална платформа што, покрај земјоделството и производството на храна, опфаќа млади и практични вештини, гастрономија, туризам, екологија, планинарство, пчеларство, сточарство, ракотворби, традиција, наука, технологии и деловно поврзување.
