Вештачката интелигенција веќе не е прашање за иднината. Таа денес менува цели индустрии и отвора нови бизнис можности, а Македонија не треба да остане само корисник на новите технологии, туку да создаде услови за домашните идеи да прераснат во компании што ќе се натпреваруваат и на странските пазари, порача премиерот Христијан Мицкоски на самитот „Стартап Револуција“ во Скопје.
„Не треба да бидеме неми набљудувачи на новата технолошка револуција, треба да бидеме активен учесник во создавање на истата. И токму новата економија ни покажува дека тоа за една мала држава воопшто не е недостижна амбиција. Затоа што во економијата на занењето, географијата станува помалку важна, а талентот, образованието, брзината, креативноста и способноста една добра идеја да се претвори во производ, стануваат поважни од големината на територијата или бројот на жители на таа држава“, изјави премиерот Христијан Мицкоски.
Од Владата посочуваат дека нивната задача е да создадат средина за домашните идеи да можат да се развиваат во производи, компании и бизниси што ќе излезат и надвор од земјава. Фокусот треба да биде создавање на современа дигитална инфраструктура, подобри и побрзи јавни услуги, поквалитетно образование и полесен пристап до капитал и меѓународни пазари. Премиерот Мицкоски, посочи дека големината на домашниот пазар не смее да ја ограничува амбицијата на претприемачите, бидејќи успешниот стартап уште од почеток треба да размислува и за европскиот и светскиот пазар.
„Нашата задача како Влада е тој потенцијал да не остане само потенцијал, туку да создадеме средина во која знаењето ќе стане производ, производот компанија, а компанијата меѓународна успешна приказна. Но државата има друга важна обврска да создаде услови во кои добрата идеја ќе има реални шанси за да успее. Тоа значи современа дигитална инфраструктура, подобри и побрзи јавни услуги, квалитетно образование, пристап до капитал, поврзување со инвеститори и меѓународни пазари.“, изјави премиерот.
Амбицијата е потенцијалот на домашните стартапи да не остане само на ниво на идеја. Со подобра инфраструктура и пристап до капитал, Владата очекува повеќе иновативни решенија да се развиваат токму тука, а потоа и на глобалниот пазар.
