– Општина Карпош денеска ќе го отвори Младинскиот центар Карпош, кој ќе функционира во Сала „Партизан“ и ќе биде наменет за спроведување програми и активности за младите.
Според организаторите, центарот ќе биде простор за едукација, младинска работа, креативни активности и иницијативи насочени кон подобрување на личниот, социјалниот и професионалниот развој на младите, како и место за нивно информирање и активно вклучување во заедницата.
На отворањето, закажано за 14 часот, ќе се обратат градоначалникот на Општина Карпош, Сотир Лукровски, и извршниот директор на Коалицијата на младински организации СЕГА, Зоран Илиески. Предвидено е обраќање и на раководителката на Младинскиот центар Карпош, Христина Јовчевска.
Со Младинскиот центар Карпош во следните три години ќе раководи Коалицијата на младински организации СЕГА, која е избрана за младинска чадор-организација за управување со центарот со поддршка на Општина Карпош.
Во рамки на програмата, во вечерните часови е предвидена и музичка програма со настап на локални бендови.
