Традиционалната саемска манифестација „Денови на мед 2026“ започна денеска на градскиот плоштад во Куманово, во организација на пчеларското здружение „Пчела“ – Куманово, со поддршка на Општина Куманово. 26-тото издание на издание на манифестацијата, ќе трае наредните три дена.
Годинава, изложуваат 27 производители на мед Куманово, Скопје, Радовиш, Крива Паланка, Кратово, Штип и Тетово. Манифестацијата ја отвори претседателката на Советот на Општина Куманово, Ивана Ѓорѓиевска, а пред присутните се обрати и претседателот на „Пчела“, Бобан Стошевски. Стошевски оцени дека годинашната пчеларска сезона е една од најслабите во последните две децении, што, според него, во голема мера се должи на климатските услови.
-Имавме исклучително жешко лето, а во мај и непредвидени мразови, поради што целосно ја прескокнавме овошната паша. Пчелите влегоа недоволно развиени во главната паша, која траеше многу кратко, а потоа одеднаш почна сушниот период и во природата немаше доволно цвет, рече Стошевски.
Тој посочи дека и пчеларите кои ги селеле пчелите на повисоки планински предели имале минимални приноси, бидејќи сушата се проширила и на повисоките подрачја. Според него, климатските промени се еден од главните предизвици за пчеларството, со оглед на тоа што летата стануваат сè потопли и пашата пократка.
На манифестацијата денеска свои производи презентираат и ученици од Државното училиште за средно стручно образование „Киро Бурназ“, кое е регионален центар за обука на возрасни. Училиштето неодамна добило акредитација за валидација на осум занимања, меѓу кои и пчелар. Горан Митевски професор по стручни предмети кажа дека валидацијата им овозможува на лица кои имаат стекнато практично знаење и искуство, но немаат формален документ, да добијат сертификат по спроведена постапка на проценка.
-Кога некој има животно искуство и знаење, но нема документ дека е пчелар, преку процесот на валидација тоа искуство може да се преточи во сертификат. Кандидатите со советникот за валидација поднесуваат документација, а потоа пред комисија од оценувачи ги докажуваат своите знаења и вештини – изјави Митевски.
Сертификатот го издава училиштето со одобрение од Министерството за образование и наука и е двојазичен, на македонски и англиски јазик. Манифестацијата „Денови на мед“ ќе трае до 3 октомври, а посетителите на плоштадот ќе имаат можност да ги разгледаат и купат производите на учесниците.
