Стартапи, инвеститори, AI лидери и иноватори од регионот и светот од денеска до 4 октомври ќе учествуваат на StartUp Revolution AI Summit во Скопје, на кој се очекува присуство на повеќе од 2.000 учесници од над 50 земји.
Во рамки на самитот, организиран од Startup Club Skopje, ќе се одржи и глобалната иницијатива „Hack for Humanity“, која ги поврзува AI заедниците ширум светот со цел создавање решенија за реални локални предизвици. Настанот во Скопје се организира со поддршка на INOVA и Women in Tech Macedonia.
На „Hack for Humanity“ ќе учествуваат програмери, дизајнери, претприемачи, студенти, истражувачи, професионалци, креативци и други заинтересирани граѓани, кои во тимови ќе работат на предизвици поврзани со технолошката писменост, пристапноста, вработувањето и други прашања од значење за локалната заедница. За учество не е потребно претходно искуство во хакатони, ниту готова идеја.
-Не мора да бидеш програмер Hack for Humanity е настан за секој што сака да придонесе. Добредојдени се програмери, дизајнери, претприемачи, студенти, истражувачи, професионалци, креативци, експерти од различни области, но и сите кои имаат идеја, проблем што сакаат да го решат или едноставно сакаат да научат и да бидат дел од нешто ново. Не е потребно претходно искуство во hackathon-и, ниту пак да имате готова идеја. Потребни се љубопитност, желба за соработка и интерес да создадеме нешто што може да има вистинско позитивно влијание – се вели во најавата.
Глобалниот „Hack for Humanity“ обединува 130 AI Collective поглавја во 50 земји. Во Скопје, учесниците ќе имаат три часа за развој на идеи и создавање AI прототипи, по што ќе ги презентираат своите решенија пред жири. Најдобрите проекти од глобалните настани може да добијат можност да бидат претставени и преку глобалниот newsletter на AI Collective, кој има повеќе од 300.000 претплатници.
-Со нетрпение чекам да видам што ќе се случи кога на едно место ќе ги собереме луѓето, нивната креативност и потенцијалот на вештачката интелигенција, со јасна цел – да создадеме нешто добро за нашата заедница. Верувам дека решенијата што ќе произлезат од Hack for Humanity нема да бидат само резултат на еден ден работа, туку поттик за понатамошно користење на технологијата за добро и за создавање уште поголеми позитивни промени. Ги повикувам сите креатори – без разлика на нивното искуство или професија – да се пријават. Верувам дека ова ќе биде незаборавно искуство, но и можност заедно да покажеме колку многу можеме да создадеме кога технологијата ја користиме со вистинска цел и изјавила Моника Ризовска Таневска, одговорна за AI Collective заедницата.
Од AI Collective заедницата посочуваат дека целта е технологијата и потенцијалот на вештачката интелигенција да се насочат кон создавање решенија што ќе имаат позитивно влијание врз локалната заедница.
