Во Пехчево официјално започнаа градежните работи за реконструкција на кровот на Општинската јавна установа Детска градинка „7 Септември“ – Пехчево, со што започнува реализацијата на уште еден значаен проект насочен кон подобрување на условите во објектите за најмладите. Градежните активности се реализираат во рамки на проектот „Воведување на мерки за енергетска ефикасност на јавни објекти и користење на ОИЕ (Подобрување на условите во образовниот процес во ИПР)”, финансиран од Бирото за регионален развој и Општина Пехчево, преку Источниот плански регион.
На почетокот на градежните работи, градоначалникот на Општина Пехчево, Александар Китански, истакна дека станува збор за реализација на уште еден важен проект за Општина Пехчево.
-Инвестициите во објектите каде што престојуваат и се воспитуваат нашите најмлади се инвестиции во иднината на Пехчево. Нашата цел е да обезбедиме безбедни, современи и квалитетни услови за децата и вработените, а со реализацијата на овој проект правиме уште еден конкретен чекор во таа насока. Продолжуваме посветено со реализација на проекти кои носат видливи подобрувања и директна корист за граѓаните, истакна Китански.
Со реконструкцијата на кровот според него ќе се подобри заштитата и функционалноста на објектот, ќе се создадат подобри услови за престој на децата и ќе се придонесе кон унапредување на енергетската ефикасност на установата.
Општина Пехчево, како што најави, продолжува со реализација на проекти во насока на подобрување на јавната инфраструктура, енергетската ефикасност и создавање безбедни и современи услови за воспитување и образование на најмладите.
