А во меѓувреме тече процедурата за избор на наследник на Ислам Абази. Претседателот на Советот на јавните обвинители, Башким Бесими, соопшти дека досега се пријавени петмина јавни обвинители кои поднеле кандидатури на огласот за избор на основен јавен обвинител на ОЈО за гонење организиран криминал и корупција.
За функцијата се кандидирани вишиот јавен обвинител Јован Цветановски, поранешниот обвинител во СЈО, а сега обвинител во Вишото јавно обвинителство, Трајче Пеливанов, обвинителката од ОЈО Скопје, Лидија Раичевиќ, како и обвинителите од ОЈО за гонење организиран криминал и корупција Искра Хаџи-Василева и Фатон Азизи.
Советот на јавните обвинители во петок ќе одржи седница на која, меѓу другото, треба да бидат формирани комисии поврзани со постапката за избор на нов шеф на Обвинителството. Согласно одлуката за свикување на 50-тата седница, на дневен ред е формирање комисија за подготвување на кандидатски листи, како и комисија за избор, кој ќе се спроведе на 28 октомври, од 8 до 16 часот.
Право на кандидатура имаат јавни обвинители со најмалку 6 години непрекинат стаж како јавен обвинител до моментот на пријавувањето и со позитивна оценка во последните 3 години.
Изборот на нов шеф на ОЈО за гонење на организиран криминал и корупција следува по истекот на мандатот на актуелниот раководител Ислам Абази, кој функцијата ја извршува од октомври 2022 година.
