Макстил и СОС Детско село потпишаа продолжување на Договорот за стратешко партнерство, потврдувајќи ја заедничката заложба за долгорочна поддршка на децата и младите без родителска грижа.
Соработката, започната во 2024 година, продолжува со грижата за една од кумските куќи, чиј клучен поддржувач е Макстил. Со тоа компанијата придонесува за потребите на семејството и за создавање безбедна, топла и поттикнувачка средина за раст и развој.
-Веруваме дека општествената одговорност има најголема вредност кога е искрена, континуирана и насочена кон создавање долгорочни позитивни промени. Токму затоа остануваме посветени на обезбедување подобри можности и посигурна иднина за децата на кои им е потребна поддршка, изјави меѓу другото Марија Дуковска-Павловска, генерална директорка на Макстил.
Според Јулијана Накова-Гапо, националната директорка на СОС Детско село, за децата е особено важно да чувствуваат дека некој останува покрај нив.
-Токму затоа долгорочните партнерства имаат голема вредност за нашата работа. Благодарни сме што имаме партнер кој ја разбира важноста на долгорочната посветеност и придонесува кон посилна и погрижлива заедница. Одлуката на Макстил е потврда на заедничката посветеност кон безбедна средина, квалитетни услови и можности секое дете да го развие својот потенцијал, изјави Накова-Гапо.
Договорот обезбедува стабилност за згрижувачката куќа и помага во покривањето на потребите на семејството и одржувањето на домот.
