Агенцијата за храна и ветеринарство ги демантира наводите на Сојузот на одгледувачи на овци „Модерен овчар“ дека четири јами во селото Соколарци, со тела на овци усмртени од овча сипаница, биле незатрупани речиси 20 дена, поради што нивните мрши биле расфрлани од диви животни и кучиња.
Од Министерството за земјоделство велат дека јамите се соодветно третирани, дезинфицирани и означени, а животните се закопани согласно протоколите.
„Местото на кое е снимено видеото е местото на кое, согласно сите биосигурносни мерки за нешетно отстранување на овци и кози, е извршено закопување на еутаназираните животни. Овците и козите се затрупани со поголем слој земја, местото е соодветно дезинфицирано и означено дека тука постои опасност од заразна болест“, информираат од Министерството за земјоделство, шумарство и водостопанство.
Од Министерството додаваат дека пронајдените овци и кози потекнуваат од сточари кај кои болеста е присутна и кои вршат незаконска вакцинација со неквалитетни вакцини, илегално набавени од Турција.
Според Сојузот, досега угинале околу 10.000 овци, а уништени се од 40 до 50 стада. Тие бараат што побрзо да започне имунизацијата на сточниот фонд со вакцините донирани од Турција, со цел да се спречи понатамошното ширење на болеста.
„За нас останува само да се убрза работата и што побрзо да си ги заштитиме стадата. Колку ќе се задржи, не знам, но институциите треба што побрзо да преземат активности и да ни ги вакцинираат овците“, изјави Илми Зекир, сточар и член на УО на Сојузот на одгледувачи на овци.
Од Министерството сè уште нема посочено точен датум за почеток на вакцинацијата. По добивањето на донацијата, вакцината ќе биде тестирана за безбедност и чистота, а дотогаш ќе се врши депопулација на заразените стада.
Надлежните предупредуваат дека неовластената имунизација ќе биде санкционирана, а за вакцинираните животни нема да има обештетување.
