Ранци, моливи, пенкала, гуми, острилки, боици, лењири, шестари, тетраки, дигитрони, хамери, маркери, пластелин, блокови, лепила –сето ова му е потребно на секој ученик за работа на училишните часови и решавање на домашните задачи. На десетина дена пред почетокот на учебната година, добра вест за родителите кои имаат деца ученици. И оваа година, училишниот прибор ќе биде на попуст. Од Владата повторно ја најавуваат мерката „Помалку трошоци, повеќе за тебе“ – попуст на целиот училишен прибор, а одлуката треба да се донесе во вторник на владина седница.
„Да ќе има и во вторник на владина седница ќе донесеме одлука.“– вели премиерот Христијан Мицкоски.
Мерката се применуваше и во изминатите две години, во секоја книжарница родителите плаќаа се, со 15% попуст и според надлежните, тоа придонесе за семејна заштеда до 2 илјади денари.
Пресметката што ја направи Алфа покажува дека во моментов без попустот за почеток на учебната година родителите треба да потрошат и до стотина евра за едно дете. Трошоците се поголеми ако тоа е прваче. Ранците сега се продаваат од илјада до четири или пет илјади денари, тетратките чинат од 15 па до 650, гумите 15 до 100, а боите и фломастерите од 100 па нагоре. Најефтините боички чинат 45 денари, додека најскапите се по 250 денари. Готови комплети од ранец, несесер и торба за ужина се продаваат по 3000 денари.
Родителите кои живеат во Карпош, Кисела Вода, Ѓорче Петров, Центар и Аердором ќе имаат уште помали трошоци за набавка на прибор. Во Аеродром секое прваче ќе добие финансиска помош во износ од 3500 денари, а секој четвртооделенец ќе добие и бесплатен таблет. Во Карпош и во Кисела Вода обезбедуваат ранец и училишен прибор за секое прваче. Во Ѓорче Петров, пак, за првооделенците е предвиден пакет мерки кој вклучува бесплатен ранец, финансиска поддршка од 3.000 денари и обезбедена ужина.
