Шангајската листа повторно без македонски универзитет. За надлежните, очекувано, затоа што сеуште не е дојдено до решението, кое е содржано во трите закони за високото образование кои се уште се во собраниска процедура. Министерката за образование и наука, Весна Јаневска, очекува со нив значително да се подигне квалитетот на високото образование, а Македонија да напредува и на меѓународните ранг листи.
„Не очекувавме во период од две години, особено без новите закони, да има некакво драстично придвижување на Шангајската листа. Трите закони, кои во моментот се во собраниска процедура, очекуваме во еден догледен период значајно да го поткренат квалитетот во високото образование, но и да ги отворат другите индикатори што ги користат не само Шангајската, туку и друггите листи за рангирање, за да можеме да се придвижиме на тие листи“ – изјави Јаневска.
Јаневска упати и јасна порака до политичарите „рацете на политиката подалеку од образованието“. Според неа, мешањето на политиката и ширењето на несоодветни информации заради политички поени, нанесуваат штета на целиот образовен систем, а последиците ќе ги почуствува сечие дете.
„Парламентот е местото каде што ќе се соочиме со сите аргументи. Ако постојат забелешки на одредени законски одредби, таму ќе се разговара за нив. Но уште еднаш ќе повторам, рацете на политиката подалеку од образованието. Нашите млади заслужуваат квалитетно образование, а со донесувањето на овие закони ќе го подигнеме квалитетот на високото образование, што е директно поврзано и со меѓународните рангирања на универзитетите“ – истакна министерката.
Со законите за високо образование, за квалитетот на високото образование и за научно истражувачка дејност се предлага нов модел на финансирање на универзитетите, построги критериуми за избор на професори, новб систем за акредитација и евалуација и финансирање на научни проекти. Целта е повисок квалитет и поголема конкурентност на универзитетите. Законите веќе неколку месеци се во собраниска процедура бидејќи од ДУИ бараат бадентерово мнозинство, и дополнително, според опозицијата, построгите критериуми биле тешко применливи и со нив ќе се нарушела автономијата на универзитетите.
