Со воени почести и полагање венци на Партизанските гробишта и на вечните почивалишта на поранешните претседатели Борис Трајковски, Киро Глигоров и генералот Михаило Апостолски, започна одбележувањето на 18 Август, Денот на Армијата. Министерот за одбрана Владо Мисајловски и делегации се поклонија пред борците кои ги положија своите животи за слободна и независна Македонија.
„Кон секој предизвик пристапуваме од исто стојалиште и иста перспектива. Носиме одлуки кои ќе нè направат посилни – се поддржуваме во секој момент и за доброто на секој војник, подофицер, офицер и вработен во Армијата. Резултатите од вложеното се видливи и тие се потврда дека се движиме во вистинска насока“, напиша на социјалните мрежи министерот Мисајловски, посочувајќи дека сите вработени во одбраната ќе бидат соодветно вреднувани.
Со воени почести, 34 години од развојот на Армијата во самостојна и суверена Македонија беа одбележани и во штипската касарна „Јане Сандански“.
Низ овие 34 години Армијата се развиваше и модернизираше, потврдувајќи ја својата подготвеност да ја брани државата и да им служи на граѓаните.
„Нашата должност е јасна – да ја браниме татковината, да го чуваме нејзиниот суверенитет и територијален интегритет и, како одговорен член на НАТО, да придонесуваме кон заедничката безбедност и стабилност. Нека ни биде водилка традицијата на генерациите пред нас, а иднината нека ни биде мотив да бидеме уште подобри“, порача потполковник Ристо Стоев, командантот на Вториот пешадиски баталјон.
Од учество во мисиите на НАТО, до помошта дома, Армијата ја покажува својата подготвеност на дело. Во изминатиот период гаснеа пожари, помагаа при природни непогоди и им даваа поддршка на институциите по трагичниот пожар во Кочани. Вечерва во 19 часот во касарната „Илинден“ во Скопје ќе се изврши почесна артилериска стрелба, додека утре, во кампот за обука на вода во Охрид, во присуство на највисокиот воен и државен врв, ќе се одржи централната манифестација по повод 18 Август – Денот на Армијата.
