Откриените над 323 килограми марихуана сокриени во бали со рециклирана хартија требало да стигнат до Турција. Таков им бил планот на сега осомничените во Македонија, Грција и Косово за шверц на дрога. Македонскиот државјанин, кој оди 30 дена зад решетки, заедно со другите од мрежата, преку однапред планиран транспортен канал, планирале марихуаната да стигне до турскиот пазар, но акцијата „Вардарис“ ги улови во Солун.
Приказната започнува во февруари, кога осомничениот набавил товарно возило, а на почетокот на март и приколка, за наводно да пренесува рециклирана хартија.
Но, откако ги завршил царинските формалности и на 8 март ја напуштил Македонија, наместо кон Турција, осомничениот се упатил кон Грција.
- „Наместо да продолжи кон Република Турција, се упатил кон Република Грција, каде возилото со приколката го оставил на изнајмен затворен плац во Солун.“
Токму таму, според истрагата, се сретнал со двајца осомничени против кои постапката ја водат грчките власти. Со едниот од нив, кој е недостапен за органите на прогонот, го договорил понатамошниот транспорт на дрогата.
- „По набавката на наркотичната дрога, двајца од осомничените, заедно со засега непознати лица, во периодот од 11 до 14 август 2026 година ја сместиле марихуаната во претходно направени отвори во балите со рециклирана хартија.“
На паркингот била пронајдена приколката, но без регистарски ознаки. Во четири палети во задниот дел од приколката и во уште четири палети поставени пред неа биле откриени вкупно 324 килограми и 474 грама.
По поднесена кривична пријава од МВР, Обвинителството отвори истрага. Обвинителот проценил дека постои опасност од бегство, влијание врз соучесници и сведоци, како и можност за повторување на делото. Поради тоа судијата на претходна постапка го прифатил предлогот и му определил 30-дневен притвор.
