Три нови случаи на западно- нилска треска. Сега вкупниот број на заболени се искачи на 34-ца, повтрдија за Алфа од Центарот за јавно здравје. Досега од вирусот кој може да предизвика воспаление на мозокот кај хронично болните, починаа двајца пациенти, едниот на возраст од 72, другиот на 83 години. Најмногу заразени има во Драчево, па Центарот за јавно здравје во соработка со Општина Кисела Вода вчеравечер организираше трета вонредна акција за прскање против комарци. Иако Драчево е една од општините каде е прогласена епидемија, жителите се со поделени мислења: дел од нив сметаат дека комарците ништо не им можат и не и придаваат особено значење на заштитата, додека дел се крајно внимателни.
Заштитата не завршува со вонредната интервенција на надлежните. Дел од граѓаните ги следат и препораките на Институтот за јавно здравје и користат средства против комарци, носат облека на долги ракави и избегнуваат да се движат навечер, во периодите кога комарците се најактивни.
Западнонилска треска е вирусно заболување кое се пренесува преку убод од инфициран комарец. Околу 80 проценти од заразените немаат никакви симптоми, а кај останатите, типични симптоми се покачена телесна температура, главоболка, замор, болки во мускулите и зглобовите, гадење и осип, при што се препорачува посета на лекар, особено ако граѓаните патувале во подрачја каде се регистрирани денга, зика, маларија и западнонилска треска.
