Бутел добива нов голем зелен простор на површина од 50.000 квадратни метри, на локација долж булеварот Христијан Тодоровски-Карпош.
Според објавата на Фејсбук на градоначалникот на Град Скопје, Орце Ѓорѓиевски, просторот кој со години бил запуштен и користен како депонија се трансформира во модерен и функционален парк.
Првиот дел од проектот, со површина од 8.000 квадратни метри, е речиси целосно завршен. Предвидени се зелени површини, плоштад, детски катчиња, пешачки патеки, фитнес-зони и содржини наменети за различни генерации.
Паралелно продолжува уредувањето на вториот дел од паркот, кој зафаќа дополнителни 42.000 квадратни метри. Целиот простор треба да биде хортикултурно и содржински уреден.
Како дел од проектот е предвиден и сопствен систем за наводнување со техничка вода, со цел одржливо одржување на зелените површини.
Од Град Скопје посочуваат дека зголемувањето на зелените површини придонесува за почист воздух, намалување на урбаната жештина и подобар квалитет на живот.
-Бутел добива ново зелено срце. Скопје добива уште едно место за гордост- се наведува во објавата на Ѓорѓиевски.
