Јули оваа година беше просечно топол и просечно врнежлив месец во споредба со многугодишните просечни вредности (1991 -2020), на ниво на држава, соопшти Управата за хидрометеоролошки работи по анализата на мерењата и набљудувањата на метеоролошките станици во Македонија. Средномесечната температура во јули се движела од 18,0 степени во Маврово до 27,2 степени во Гевгелија.
-Споредено со просечните јулски средномесечни температури, за триесетгодишен период (1991-2020), годинашната температура беше просечна на ниво на држава. Највисоката максимална температура во државата беше измерена на 20 јули во Гевгелија и изнесуваше 39,5 степени. Најниската минимална температура во текот на месецот беше измерена во Берово, на 10 јули, и изнесуваше 4,6 степени, соопшти УХМР.
Наведува и дека на 21 јули беше регистриран екстремно силен ветер, со појава на оркански удари на повеќе мерни места. Во Штип бил регистриран најголемиот максимален удар со брзина на ветерот од 134 километри на час со правец од запад-северозапад, додека во Скопје – Зајчев Рид ветерот бил со максимален удар со брзина од 130 км на час од север-северозападен правец.
-Месечната сума на врнежи во државата во јули 2026 варираше од 14 мм во Охрид до 60 мм во Крива Паланка. Врнежите беа од дожд и град. Максимално дневно количество на врнежи од 27 мм беше регистрирано во Крива Паланка на 2 јули. Споредено со јулската просечна вредност за многугодишен период (1991-2020), измерената месечна сума на врнежи беше просечна на ниво на држава, информира УХМР.
