Насилството меѓу децата станува сè побрутално. Од туркање и тепачки, до нож, камења и најгрубо понижување. А можеби еднакво страшен како и оној што удира е и оној што стои, гледа, снима и го објавува насилството. Надлежните велат – мора да се реагира порано, а не дури откако ќе има жртва.
„Навистина станува веќе, според мое длабоко мислење, неподносливо она што се случува. Немам впечаток дека е многу зголемена агресијата, можеби е само повидлива и попријавена, но сметам дека е станата побрутална. И во минатото децата ќе се степале на разноразни теми, и повеќе од она што вообичаено го велиме тинејџерско туркање, докажување и така натаму. Но сега имаме гаѓање на цигари од тело, имаме бодење со нож, имаме понижување во најгрубата форма која може да постои на едно човечко суштество“, вели министерката Весна Јаневска.
Министерството за образование најавува системски пристап – наставниците да бидат обучени да ги препознаваат првите знаци на агресија кај учениците, но и знаците дека детето доаѓа од семејство во кое има проблеми. Проектот се реализира со Комората на психолози и со вклучување на стручните служби, наставниците и родителите. Досега се одржани седум настани во 30 општини.
Но превенцијата не е единствената мерка. Министерството предлага и санкции и казни за родителите на децата кои вршат насилство. И тој закон во моментов е во Собрание и го очекуваме да биде изгласан што е можно побрзо.
Претседателката Гордана Сиљановска-Давкова, пак, предупредува дека борбата против насилството не може да започне само кога ќе се случи инцидент. Според неа, однесувањето се учи – па затоа и љубовта, почитта и мирното решавање на конфликтите мора да се учат од најрана возраст.
Од училиштата се бара да бидат безбедно место за учење, а не место каде што детето ќе стравува од другото дете. Обуките, раното препознавање и санкциите се дел од системот што треба да спречи насилството да стигне предоцна.
