Министерот за односи меѓу заедниците, Агон Ферати оствари средба со резидентната координаторка на Обединетите нации во земјава Рита Колумбија, на која се разговарало за зајакнување на соработката и поддршката на процесите поврзани со развојот на земјата.
Како што соопшти Министерството за односи меѓу заедниците на средбата била истакната важноста на тесната соработка со младите, додека посебно внимание било посветено на Петгодишната рамка за соработка со Владата. Во рамките на оваа соработка се разговарало и за четирите главни столба, меѓу кои и реформите поврзани со Европската Унија и спроведувањето на приоритетите од владината програма.
Значаен дел од разговорот бил посветен на приближувањето и соработката меѓу различните етнички заедници во земјата, со посебен акцент на младите како обединувачка сила.
-Во таа насока беше оценета важноста на младинските клубови кои функционираат во рамките на општините, како и на студентските унии, како простори каде што младите можат поактивно да се вклучат во општествениот живот и во процесите на донесување одлуки – се наведува во соопштението.
