Делчево вечерва го започнува тридневниот музичко-фолклорен фестивал во рамки на Делчевското културно лето, со богата програма која обединува традиционален фолклор и концерти на познати музички имиња. Организаторите очекуваат во текот на викендот градот да го посетат илјадници гости од земјава и соседството.
Фестивалската програма започнува во 18 часот со дефиле на учесниците на 31. издание на „Голачките фолклорни средби“, додека официјалното отворање на манифестацијата е предвидено за 20 часот на летната сцена.
Во првата фестивалска вечер ќе настапат Фолклорната група „Вапцаров“, Женската пејачка група „Ѓурѓа“, Фолклорниот ансамбл „Бели мугри“ од Кочани, Етно трио „Евина“ од Ќустендил, Влашката пејачка група „Грамостен“ од Скопје и КУД „Дукати“ од Крагуевац, Србија. По фолклорната програма ќе следуваат концерти на Влатко Миладиновски и на македонската рок-група „Супер хикс“.
Втората фестивалска вечер е целосно посветена на „Голачките фолклорни средби“, на кои ќе настапат 11 фолклорни ансамбли, оркестри и пејачки групи од Македонија, Србија и Бугарија, претставувајќи дел од богатото културно наследство на Балканот.
Фестивалот ќе биде заокружен во третата вечер со настапите на Иван и Ангел, по што ќе следува концерт на српската музичка група „Амадеус бенд“.
„Голачките фолклорни средби“ се една од најдолговечните културни манифестации во источниот дел на државата и традиционално се организираат во рамки на програмата на Делчевското културно лето.
