Градоначалникот на Општина Виница, Митко Костадиновски, денеска оствари работна средба со новоназначениот началник на ОВР Виница, Даниел Трајчев.
Приликата, информираат од локалната самоуправа, беше искористена за разговор за заедничките надлежности и области во кои соработуваат Министерството за внатрешни работи и Општината, со посебен акцент на безбедноста во сообраќајот и севкупната безбедност на граѓаните.
Градоначалникот Костадиновски го информирал началникот Трајчев дека Општина Виница изработила сообраќаен проект за поширокото централно градско подрачје, кој во наредните денови ќе биде доставен до СВР Штип за одобрување.
-По добивањето на согласноста ќе следува негова реализација, од која очекуваме значително подобрување на сообраќајниот режим, паркирањето и безбедноста на сите учесници во сообраќајот, смета градоначалникот на Општина Виница.
На средбата Костадиновски побарал засилено присуство на полициски патроли и поинтензивни контроли, со цел дополнително да се унапреди јавната безбедност и да се обезбеди поголема сигурност за сите граѓани.
-Верувам дека со добра координација и партнерска соработка ќе придонесеме за побезбедна и поуредена Виница, нагласил виничкиот градоначалник Митко Костадиновски во разговорите со новиот началник на ОВР Виница, Даниел Трајчев.
