Општина Гази Баба утре ќе одржи комеморативен настан посветен на одбележувањето на 10-годишнината од катастрофалните поплави од 2016 година во Стајковци и други населени места и Сингелиќ, во кои загинаа 22 лица. На настанот ќе им биде оддадена почит на загинатите и ќе биде испратена порака дека споменот, солидарноста и одговорноста се трајна обврска.
– Поминаа 10 години од катастрофалната поплава која на 6 август 2016 година ја погоди Општина Гази Баба и однесе човечки животи, зад себе оставајќи неизмерна болка, уништени домови и семејства кои засекогаш останаа без своите најмили. Денес, со длабока почит и пиетет, се поклонуваме пред споменот на сите оние кои трагично ги загубија своите животи. Нивниот спомен ќе остане вечен, а нивната судбина засекогаш ќе нè потсетува колку е непроценлива вредноста на човечкиот живот – посочуваат од Општина Гази Баба.
Од Општината изразуваат искрена благодарност до сите кои во тие тешки денови покажале несебична хуманост и солидарност.
– Благодарност до спасувачките служби, припадниците на Армијата и Министерството за внатрешни работи, пожарникарите, Црвениот крст, здравствените работници, институциите, доброволците, хуманите граѓани и сите кои без двоумење подадоа рака кога беше најпотребно. Трагедијата од 2016 година покажа дека и во најтешките мигови нашите граѓани знаат да бидат едно. Таа солидарност, човечност и меѓусебна поддршка остануваат најголемата сила на нашата заедница – наведуваат од Општината.
Оттаму наведуваат дека продолжуваат да вложуваат во превенција, безбедност и инфраструктура, со цел никогаш повеќе да не се повтори ваква трагедија и да биде изградена уште посигурна и поотпорна општина за идните генерации.
Скопје денеска одбележува десет години од невремето што предизвика поплави во кои загинаа 22 лица. Попладнето на 6 август 2016, скопскиот регион беше погоден од обилни врнежи од дожд и силен ветер. Загинатите во невремето беа во реоните на селата Сингелиќ, Стајковци, Смилковци и Арачиново.
Во текот на 24 часа на 6 август 2016 во Скопје наврнале 92,9 литри на метар квадратен, а во текот на првите два часа од почетокот на невремето имало повеќе од 800 громови.
Невремето и поројот од вода предизвика пад на дрвја, а домовите останаа без електрична енергија. Околу илјада граѓани беа евакуирани во текот на ноќта на 6 август.
Граѓаните од целата држава координирани од Црвениот крст, Кризниот штаб и надлежните институции во наредните денови се солидаризираа за собирање на најнеопходната помош за настраданите. 8 август 2016 беше прогласен за Ден на жалост во Република Македонија.
Управата за хидрометеоролошки работи во извештаите по невремето информираше дека на Зајчев рид – главната метеоролошка станица во Скопје, бил забележан рекорден интензитет за петчасовни врнежи од 84,5 милиметри.
