Скопскиот градоначалник Орце Ѓорѓиевски денеска оствари средба со амбасадорката на Република Хрватска во Македонија, Нивес Тигањ, беа разгледани можностите за унапредување на соработката меѓу збратимените градови Скопје и Загреб – соопштија попладнево од Град Скопје.
– Во фокусот на разговорите беа размената на знаења, искуства и добри европски практики во повеќе области од заеднички интерес, со цел нивна примена во креирањето современи и одржливи решенија што ќе придонесат за подобар квалитет на живот на граѓаните на двете метрополи. Особено внимание беше посветено на можностите за соработка во рамките на проектот „Скопје – европска престолнина на културата 2028“. Соговорниците разговараа за меѓународната промоција на проектот, културната размена, како и за поврзувањето на Скопје со европските градови, институции и културни мрежи – пишува во соопштението.
На средбата било истакнато дека проектот „Скопје – европска престолнина на културата 2028“ претставува значајна можност за афирмација на главниот град како современ европски културен центар, кој успешно ги спојува богатото историско наследство, културната разновидност и современата креативна енергија.
– Двете страни ја потврдија подготвеноста за понатамошно продлабочување на партнерството меѓу Скопје и Загреб преку реализација на конкретни заеднички проекти и иницијативи, кои ќе придонесат за зајакнување на пријателските односи меѓу Северна Македонија и Хрватска и ќе донесат придобивки за граѓаните на двете земји – се истакнува во соопштението.
