Од 1 август инхалаторот „Фостер“ повторно ќе се издава без доплата, а пациентите ќе плаќаат само партиципација од 280 денари. Ова следува откако цената на лекот нагло порасна од околу 300 на 1.080 денари, што предизвика бурни реакции кај пациентите со астма и хронична опструктивна белодробна болест.Новата цена ќе важи откако аптеките ќе ги потрошат залихите набавени по старата, повисока цена.За граѓаните кои во меѓувреме го купиле лекот по цената од 1.080 денари нема да има рефундација.Во аптеките веќе е достапен и „Блоцета“, лек што може да се подигне без доплата. Но, пациентите не можат да го земат со извештај издаден за „Фостер“, туку им е потребен нов извештај од специјалист.
„Обезбедивме лек без доплата за корисниците на „Блоцета“. Истовремено направивме притисок производителот на „Фостер“ да размисли како ќе продолжи понатаму. Во тринеделна комуникација со нив, производителот на „Фостер“ вчера достави известување дека прифаќа лекот да биде во продажба по нова цена од 1.915 денари. Тоа значи дека „Фостер“ повторно ќе биде достапен без доплата, односно пациентите ќе плаќаат само партиципација од 280 денари, бидејќи референтната цена на овој лек е пониска“, изјави директорот на ФЗОМ, Сашо Клековски.
Клековски вели дека намалувањето на цените очекувано наишло на отпор, бидејќи со пониските цени се намалуваат и заработките на фармацевтските компании, но и маржите на аптеките.
Во ФЗОМ веќе пристигнале поплаки од граѓани дека некои аптеки, па дури и матични лекари, одбиваат да им го издадат или препишат лекот преку Фондот.
„Ние активно работиме како Фонд, во соработка со матичните лекари и со аптеките, да ги надминеме недоразбирањата. При последното проширување на позитивната листа воведовме три скапи лекови кои се во посебна категорија на контрола. Претпоставувам дека спротивставувањата и отпорот беа малку поголеми од вообичаеното. Сепак, активно работиме со сите засегнати страни да ги надминеме овие проблеми и мислам дека почетните потешкотии ќе се стабилизираат. За да го потврдиме тоа, од вчера почнавме со контроли во аптеките за да утврдиме дали на пациентите им се овозможува да ги добиваат новите лекови на рецепт“, додаде тој.
Покрај промените поврзани со „Фостер“, од 1 јули на позитивната листа се најдоа уште три нови лекови за разредување на крвта – „еноксапарин“, „надропарин“ и „ривароксабан“.
Тоа значи дека пациентите на кои им е потребна оваа терапија веќе можат да ги подигнат лековите преку Фондот, а тие се достапни во аптеките.
Ања Лукарова
