Над 7.000 медицински сестри недостасуваат во македонскиот здравствен систем за да ги достигне основните европски стандарди. Проблемот, велат од сестринските здруженија, не е само во платите. Медицинските сестри во Македонија сè уште немаат сопствен закон, немаат лиценцирање преку своја комора и, според нив, немаат доволно јасно институционално место во системот.
„Не се само личните доходи причината за нешто. Значи, таа здрава работна околина која го прави кариерниот развој и образовните квалификации, договорите на дело, неконтинуираните конкурси, статусот во болниците на додатоци на плата на непризнаено образование, неможност за авторитетивност во болниците, неможност за институционална празнина без неозаконети, нелиценцирани“, вели Гордана Бешлиовска, претседател на Здружението за медицински сестри на Македонија.
Од Здружението на медицински сестри потенцираат дека ова влијае врз кариерниот развој и задржувањето на кадарот. Во стационарниот сектор недостигот достигнува половина од потребниот среден кадар, а одливот продолжува. Според неофицијалните податоци со кои располагаат сестринските здруженија, околу 2.000 медицински сестри заминале од државата, а по ковид-пандемијата, велат, издавале и по стотина потврди месечно на сестри кои заминувале во странство. Но, дел од сестрите не заминуваат само од државата, туку и од професијата.
„Во Агенцијата за вработување ќе видите сестри кои чекаат за вработување, всушност, не постојат. Тоа се сестри кои или ја промениле професијата или заминале во странство. И тоа е во моментов и најпопулистичко заминување од професијата. Тоа е тоа што многу нè загрижува. Сестри кои имаат стаж, кои имаат искуство, заминуваат. Искуство, заменуваат професијата и ги видите во сосема други области, во козметички салони, во угостителство“, вели Бешлиовска.
Медицинските сестри предлагаат болниците во Македонија, по примерот на околните земји, континуирано да имаат отворени конкурси за вработување на медицински сестри. Во моментов во државава има вкупно 9.200 медицински сестри.
