Со 5,5 милиони евра ќе се финансираат научни и иновативни проекти од страна на МОН. Овие пари од држата ќе бидат наменети за развој на научноистражувачката инфраструктура во Македонија.Во првиот конкурс ќе бидат финансирани 40 научно-истражувачки проекти на државните универзитети, факултети, научни институти и МАНУ. Секој прифатен проект ќе добие буџет најмногу до 8 милиони денари најдоцна до 31 октомври 2026 година.
„Од нив, 15 ќе бидат од подрачјето на природно-математички науки, инженерство и технологија, медицински и здравствени науки, земјоделски и ветеринарни науки. Понатаму, 15 проекти од подрачјето на општествени и хуманистички науки и 10 проекти во области од стратегијата за паметна специјализација во насока на дигитална и зелена транзиција, односно паметно земјоделство и храна со повисока додадена вредност, информациски и комуникациски технологии, електро-машинска индустрија, и одржливи материјали и паметни згради“, информираше министерката за образование и наука Весна Јаневска.
Секој апликант може да конкурура со повеќе проекти од различни области, а четири е максималниот број на проекти што би можеле да бидат финансирани. Законски проектите не смеат да бидат идентични со некои веќе претходно реализирани.
„Вториот конкурс е наменет за распределба на средства на осумте самостојни јавни научни установи, кои вршат дејност од висок стратешки и национален интерес за државата. И тука ќе се финансираат научно-истражувачки проекти со времетраење до најмногу две години, за што ќе се доделува поединечен буџет до најмногу 3 милиони денари, односно по 1,5 милион денари во 2025 и во 2026 година“, додаде Јаневска.
Последно финансирање на научни и иновативни проекти било во 2021 година. А претходно повеќе од 10 години немало таков повик од страна на МОН. Дел од средствата за оваа година се во рамки на годинашниот буџет за наука кој е двојно поголем од ланскиот и изнесува 680 милиони денари, а еден дел од парите ќе се исплатат во текот на следната календарска година, кога и треба целосно да завршат проектите што ќе се прифатат.
Ања Лукарова
