400 милиони евра се одвоиле од државната каса за покривање на трошоци од сообраќајните несреќи во 2023-та година. Колку ќе се намали процентот на незгодите, толку ќе се заштеди од парите на граѓаните, одговара министерот Панче Тошковски на тврдењата дека со системот „Сејф сити“ власта ќе ја полни државната каса.
Според статистиката на МВР за последните четири години, најголемиот дел од прекршителите, односно над 55 илјади, имаат по една изречена забрана. Но, од нив речиси 8 илјади добилe забрана по втор пат, а 1.863 возачи добиле по три правосилни пресуди за забрана за управување возило.
- „Имаме 687 лица со четири забрани, 291 со пет забрани, а имаме и рекордери – двајца возачи кои имаат по дури 40 изречени забрани за управување моторно возило“, истакна Тошковски.
За Тошковски апсурдни се обвинувањата на опозицијата дека системот е насочен само кон етничките Албанци во Македонија. Зијадин Села обвинува дека во Чаир има многу повеќе камери, отколку во другите општини. За граѓаните пак токму таму треба да се засили имплементацијата на „Сејф сити“.
- „Не е точно дека нема камери на улицата која ја напоменавте (Пластичарска). Имаме и таму камери. Не е точен фактот дека камерите се поставени да се делува на било кого било како. Точно е дека 80 отсто локациите се одбрани од некој претходен менаџерски систем. Точно дека системот не е совршен пред нас имаме и те како работа. Но факт е дека наместо 11 имаме 4 жртви“ рече Тошковски.
На вториот ден безбедносниот систем регистрираше вкупно 651 прекршоци. Од нив, 50 се за минување на црвено, за поголема брзина имало 585 прекршоци, а за нерегистрирани возила 16 прекршоци. А изречени биле дури 58 забрани за управување на моторно возило.
