Се намалува бројот на хоспитализирани пациенти од трагедијата во Кочани кои се сместени во домашните болници.10 повредени се пуштаат на домашно лекување. На сите кои ќе бидат испишани од клиниките им се направени комплетни токсиколошки анализи и се во стабилна состојба. Од 115-те пациенти кои се лекуваат во странство еден, кој е на лекување во Истанбул е со сериозна и критична слика. Дел од повредените кои биле на механичка вентилација се веќе екстубирани и дишат самостојно, а има пациенти кои веќе се на нозе и за една недела ќе бидат пуштени дома. Министерот Таравари вели дека следниот предизвик за повредените се превенција од инфекции.
Сите 47 пациенти за кои се грижат македонските лекари се во стабилна состојба потврдува трауматологот Игор Мерџановски. Тој вели дека со натчовечки напори се борат за секој човечки живот.
20 пациенти после пожарот во Кочани побарале помош на Клиниката за токсикологија поради вдишување на отровни материи.Од нив 13 поради влошување на состојбата и потреба од механичка вентилација, биле префрлени на хирушките клиники.
“Некои од тие пациенти завршија и во центрите надвор од државата. Сите се во добра општа состојба, стабилни се. Кај нас во моментов хоспитализирани се 7 пациенти кои главно имаат вдишано голема количина отровни гасови затоа што биле внатре во дискотеката додека таа горела. Немаат механички повреди туку се со инхалаторни повреди, односно повреди заради вдишување на отровни гасови” – рече д-р Чибишев.
Здравствените власти велат дека повеќе не се праќаат пациенти надвор од земјава. И дел од приватните болници информираат дека остануваат отворени за за прием на повредените пациенти. „Аџибадем Систина“ се става на располагање за бесплатен третман на сите пациенти од кочанската трагедија.
Во однос на трошоците за лекувањето во странство, Таравари јасно рече дека е бесплатно. Тој потсети дека Министерството обезбедило и патување за двајца родители или членови од семејството на секој пациент, како и нивно сместување во странство, нагласувајќи дека нема потреба од шпекулации дека некои семејства треба да платат за третманот.
