Министерот за култура и туризам Зоран Љутков денеска во Свети Николе го отвори Меѓународниот фестивал на изворен фолклор „Тодорица“ 2026.
Како што информира Министерството, во своето обраќање пред присутните Љутков истакна дека оваа манифестација е значаен симбол на духовната сила, културната меморија и идентитетот на народите.
-Фолклорот не е само песна или оро, туку жив јазик на традицијата во кој се втиснати историјата и мудроста на предците. Фестивалот претставува мост меѓу генерациите и народите, културната различност не разделува, туку збогатува, рече Љутков.
Според него, ваквите настани ја зајакнуваат соработката и пријателството и придонесуваат за афирмација на земјата како простор на богато културно наследство.
-Љутков посочи дека Министерството за култура и туризам ќе продолжи и во иднина да ги поддржува манифестациите што ја негуваат автентичната традиција и ги поттикнуваат младите да ги чуваат своите корени, се наведува во соопштението.
