Виктор Стојанов е бугарски државјанин и претседател на фондацијата „Македонија“, против кого Јавното обвинителство поднесе кривична пријава поради сомнение за сторено кривично дело „ширење на расистички и ксенофобичен материјал по пат на компјутерски систем“, предвидено и казниво согласно член 394-г став 1 од Кривичниот законик на Македонија.
Стојанов е добро познат на македонската јавност поради низа јавни настапи и објави што предизвикаа реакции, во кои го оспорува постоењето на македонската нација и национален идентитет. Во изминатиот период тој беше поврзуван и со кампањи во кои се нудеше финансиски надомест од 300 евра за промена на презимиња со наставките „-ов“ и „-ев“, како и со активности за донирање бугарски знамиња и промоција на сателитска телевизија со бугарски канали.
Дополнително, во јавноста беа забележани и активности преку повеќе интернет-портали и подкасти, меѓу кои vestimak.mk, vestimk.mk, 24mk.mk и „Почетна пресметка“, преку кои се пласираа содржини оценети како провокативни и насочени кон создавање тензии.
Во рамки на фондацијата „Македонија“ регистриран е и посебен веб-сајт, www.supportbginmk.eu, преку кој се објавуваат содржини и иницијативи поврзани со делувањето на организацијата.
