Трета среќа, се продаде луксузниот автомобил „Ауди А6“ на Рамиз Мерко. За сума од 22 илјади евра, возилото со волан од змиска кожа, за кое Мерко своевремено искешира 67.000 евра, сега ќе го вози битолчанец. На аукцијата за купување на аудито, кое беше симбол на општинскиот комфор од минатото, биле заинтересирани петмина.
Службениот автомобил со кој своевремено Мерко се развозуваше, сега низ Битола ќе се вози за трипати пониска цена од онаа што тој ја плати пред седум години. Парите од продажбата ќе завршат на сметка на извршителот, а потоа ќе бидат насочени кон подмирување на побарувањата на доверителите.
Продажбата на аудито одеше преку овластен извршител, кој пред четири месеци го заплени автомобилот поради неплатени долгови кои Општина Струга ги има кон повеќе доверители.
„Истите средства ќе влегуваат во буџетот на Општина Струга, каде ќе се измируваат долгови од претходно со извршители. Значи, во тој случај општината секако добива со продажбата на аудито. Долгот на општината е околу 7 милиони евра“, вели Менди Ќира, градоначалник на Струга.
Мерко на Ќира му остави во аманет долг кој ја надминува сумата од 7 милиони евра, бидејќи каматите секојдневно растат.
Инаку, за црното „Ауди А6“, струшкиот градоначалник велеше дека воопшто не била скапа лимузина и дека функционери имале скап возен парк, но тој во јавноста бил трн во око, оти бил многу успешен. Пишман бил што не купил уште поскапо возило.
„Каков градоначалник ви се гледам јас, ќе одам со фичо? Стотина аудија, мерцедеси, едно, друго, а јас со опел вектра? Па не вреди еден градоначалник со скинати алишта и слаба кола“, изјави своевремено Рамиз Мерко.
За потсетување, Мерко беше гонет за злоупотреба на службената положба затоа што набавил четири службени возила, меѓу кои и аудито, во услови кога општината имала неподмирени долгови и блокирана жиро-сметка. Контроверзниот градоначалник, кој се најде на црната листа на САД за корупција и мешање во судски процеси, куртули од затвор. Судот го ослободи од вина за луксузниот возен парк, тежок околу 114.000 евра.
