Двете изложби на македонските уметници, „Ехо“ на Ана Ивановска и „поПуст(о) % – исто“ на Марија Сотировска Богдановска, ќе бидат затворени утре со свечен настан што ќе се одржи од 19 часот во галеријата Prima Center Berlin.
Како што соопштуваат авторките, изложбите кои се поставени во галеријата се дел од одбележувањето на јубилејот „25 години kolonie wedding“ (2001–2026), четиридневна манифестација што од 25 до 28 јуни го претвора берлинскиот кварт Вединг во отворена сцена со бројни галерии, ателјеа и уметнички настани. Поставките на Ивановска и Сотировска Богдановска се вбројуваат меѓу централните содржини во програмата.
Изложбата „Ехо“ на Ана Ивановска преку фотографија, фотомонтажа и инсталација обработува теми поврзани со последиците од глобалните кризи врз поединецот. Во фокусот се мотиви како маски, ракавици и човечки фрагменти, кои ја симболизираат ранливоста и прекинатата комуникација.
Од друга страна, „поПуст(о) % – исто“ на Марија Сотировска Богдановска го користи визуелниот јазик на трговијата – етикети, попусти и рекламни пораки – за да ги преиспита вистинските вредности во општеството, меѓу кои пристапот до вода, здравствена заштита, енергија и условите за труд.
Двете авторки се дел од женската уметничка група МОМИ и редовно излагаат во Prima Center Berlin, простор кој со години претставува значајна платформа за презентација на македонската уметност во германската престолнина.
Свеченото затворање ќе се одвива во присуство на авторките, на амбасадорот на Македонија во Германија, Илбер Села, како и бројна публика.
