Тринаесет деца до две годинишна возраст од детската градинка „Корчагин“ од Центар имаат наод на салмонела, а се чекаат уште резултати. Детската градинка „Корчагин“ во Центар деновиве е под строг надзор и со посебни мерки, пренесува Телма.
Здравствени работници од Центарот за јавно здравје направиле увид и земале микробиолошки примероци.
Децата се со потврден наод, а негувателите биле негативни. Тестовите ќе покажат дали некој од кујнскиот персонал е заразен.
Санитарни инспектори веќе ја посетиле градинката и издадени се повеќе мерки.
Иако од страна на Центарот за јавно здравје од Скопје веќе е направен увид, ниту една од насоките до менаџментот не гласи да се повикаат и инспектори од Агенцијата за храна и ветеринарство, брифираат од градинката.
До Агенцијата за храна и ветеринарство не пристигнала ниту претставка.
Првиот случај е регистриран пред една недела. Потоа се појавиле и другите случаи. Симптомите присутни кај децата биле дијареја и покачена телесна температура.
Но, засега не е констатирано од каде е потеклото на заразата.
