Вицепремиерот и министер за европски прашања Беким Сали денеска оствари средба со директорката на Националната агенција за европски образовни програми и мобилност, Ана Михајлова, на која било разговарано за можностите за унапредување на соработката во спроведувањето на европските програми, со посебен акцент на програмата „Еразмус+“.
Информацијата за средбата Сали ја објави на својата фејсбук-страница посочувајќи дека во фокусот биле и можностите за продлабочување на соработката на Агенцијата со фондации од областа на образованието, културата, здравството и спортот, како и создавање поголеми можности за лицата со попреченост.
– Разговаравме и за зајакнување на соработката на Агенцијата со фондации од областа на образованието, културата, здравството и спортот, како и за создавање поголеми можности за лицата со посебни потреби. Ја нагласивме важноста од тесна институционална соработка меѓу Министерството за европски прашања и Националната агенција во реализацијата на европските програми и ефикасното искористување на ИПА-фондовите, со цел да се создадат повеќе можности за граѓаните и да се забрза процесот на европската интеграција – се додава во објавата.
