Случајот што ја потресе јавноста добива судска разврска. Во Основниот суд во Куманово започна постапката против 25-годишниот Трајко Бојковски од Старо Нагоричане, обвинет за серија тешки кривични дела, меѓу кои пет убиства и два обида за убиство.
Во судницата беше спроведен со лисици, а додека медиумите го снимаа се клацкаше на столицата и гледаше кон плафонот, без да реагира на присуството на јавноста.
Тој е обвинет за серија тешки кривични дела – пет убиства и два обида за убиство.
Адвокатот Драган Трајковиќ кој му беше бранител на обвинетиот, го откажа полномошното, затоа што Бојковски не го послушал и не признал вина.
Последниот случај, според Обвинителството, е од 9 февруари годинава, кога во Челопек повторно се обидел да лиши од живот жена, но се откажал и побегнал откако слушнал звук.
Обвинителството тврди дека жртвите биле главно повозрасни и немоќни жени, нападнати во нивните домови во селата Клечовце, Драгоманце, Старо Нагоричане и Челопек. Во обвинението се наведува дека дел од нападите завршиле со смртни последици, додека два случаи биле прекинати откако жртвите побарале помош или поради неочекувани околности. Според надлежните, во текот на истрагата биле направени повеќе вештачења, а доколку обвиненијата бидат докажани, на Бојковски му се заканува казна затвор од најмалку десет години или доживотен затвор.
