Околу 38 милиони денари од Министерството за животна средина ќе се слеат во Општина Прилеп за реализација на три капитални водоснабдителни и комунални проекти. Се поставуваат водоводи во населени места, во Индустриската зона „Селце“, како и во градот. Сите овие проекти се дел од Програмата за 2026 година и треба да бидат завршени до наесен. Според заменик-министерката за животна средина, ваквите потези на Министерството се доказ дека тоа останува сериозен партнер на општините за нивниот еко-развој.
Тонско Ане Лашкоска – заменик-министер за животна средина.
„Тука сме во село Лениште, каде што со целосни средства од Министерството, во износ од 21.219.803 денари, се гради водоводна мрежа… Во исто време се гради водоводна мрежа во Индустриската зона и населеното место Селце. Таму станува збор за проект вреден 9.779.604 денари, а во завршна фаза е проектот за промена на водоводната мрежа од јазолот на Булевар „Гоце Делчев“ со улица „Кузман Јосифоски“… Вредноста на финансирањето е 7.133.381 денар“, – изјави Ане Лашкоска, заменик-министер за животна средина.
Тонско Дејан Проданоски – градоначалник на Прилеп.
„Заедно со помош од Министерството работиме на неколку проекти. За сите проекти граѓаните ќе бидат информирани. Правиме и секојдневен притисок врз изведувачите да ги забрзаат своите активности за да ја искористиме оваа градежна сезона и да ги ставиме во функција до крајот на градежната сезона, а со тоа да покажеме посериозна реализација на буџетот и на средствата што ни се доделени од надлежните министерства“, – кажа Дејан Проданоски, градоначалник на Прилеп.
Инаку, Министерството за животна средина вложува сериозни средства и во подготвителните активности за претстојната изградба на Регионалната депонија во Новаци. Според Лашкоска, таму процесот е во втората фаза, која опфаќа доделување канти, контејнери и камиони за ѓубре на сите 18 општини од Пелагонискиот и Југозападниот регион, кои во иднина ќе ги користат услугите на оваа модерна депонија, чија изградба треба да започне најдоцна до почетокот на идната година.
