Култното кино „Милениум“ ќе се реконструира, ќе се обнови библиотеката „Браќа Миладиновци“, како и Планетариумот во МКЦ, како дел од подготовките во пресрет на 2028 година, кога Скопје ќе ја носи титулата „Европска престолнина на културата“.
Финансирањето на овие проекти, кои се од особено значење за градот, ќе биде обезбедено со ребалансот на градскиот буџет.
Во него се предвидуваат финансиски средства и за реализација на многубројни проекти од областа на урбаното планирање, локалниот економски развој, комуналните работи, спортот, образованието и заштитата на животната средина. Посебен акцент се става на реализацијата на проектите од областа на културата.
Советниците на Град Скопје ќе расправаат и за Предлог-планот за изменување и дополнување на Планот на програмите за развој за периодот 2026-2028 година, според кој се одобруваат средства за изградба на нова противпожарна станица за Бригадата за противпожарна заштита на Град Скопје.
Со изградбата на новиот објект се очекува зголемување на брзината на реакција на пожарникарите при технички интервенции, спасување човечки животи и ефикасна заштита од пожари во урбана средина и на отворен простор.